Në këtë periudhë është folur shumë për lojtarët që po i bashkohen Kosovës, ka pasur debate pa fund në lidhje me ata që ikën dhe ata që refuzuan, duke u përmendur pa kriter edhe fjala “tradhtar” nga shumë njerëz. Megjithatë, një rast i veçantë është ai i Adnan Januzajt: mesfushori i talentuar me origjinë nga Kosova duket se nuk do t’ia dijë fare për përfaqësuesen e re, që po grumbullon bijtë e vet nga gjithë Europa. Januzaj zgjodhi të luante për Belgjikën para pak kohësh, por niveli i tij në rënie dhe refuzimi për të luajtur me Belgjikën U21 bënë që belgët “t’i heqin vizë” dhe zor se do të luajë më për kombëtaren e vendit ku u rrit. Logjikisht, ndoshta tani ishte momenti i artë për të treguar se nuk i ka harruar rrënjët e tij, por Januzaj nuk po i përgjigjet fare Kosovës. Kryetari i FFKsë, Fadil Vokrri, ka deklaruar në Koha Vision TV se futbollisti i transferuar së fundi te Sandërlendit nuk po i kthen përgjigje Kosovës: “Nuk kemi ndonjë përgjigje nga ai. Më habit fakti që nuk ka gjetur kohë që të flasë me ne. Ne nuk do të vrapojmë pafundësisht pas tij. Kam biseduar me një prej familjarëve të tij dhe i kam lënë një mesazh që të më kontaktojë. Nuk kam asnjë risi në këtë drejtim”, ka thënë ai.
