Kryepeshkopi Anastas Janullatos këtë të dielë ka dhënë një mesazh për zgjedhjet e përgjithshme parlamentare të 25 prillit. Kreu i Kishës Autoqefale të Shqipërisë theksoi se qytetarët duhet të jenë të përgjegjshëm për të votuar dhe sipas tij nuk mund të tregohemi indiferentë e të themise nuk merremi me çështje politike.
“Sikundër e dimë të Dielën tjetër do të kemi Zgjedhjet e Përgjithshme në Shqipëri. Dua që të rikujtoj edhe njëherë tjetër mendimin tonë si Kishë Orthodhokse. E kemi theksuar që në vitin e parë se Kisha jonë nuk merret me Partitë Politike dhe as nuk përzihet në çështjet politike që ka vendi. Ky është parimi i parë që ne si Kishë kemi ndjekur. Por ka dhe një parim të dytë që është mjaft i rëndësishëm – ne, të Krishterët Orthodhoksë, si qytetarë të këtij vendi – duhet të jemi të përgjegjshëm dhe kemi detyrimin për të votuar. Nuk mund të themi jemi indiferentë dhe nuk merremi me çështje të tilla si këto”, tha Janullatos.
Më tej ai theksoi se duhet të votojmë njerëz të cilët janë të pastër dhe kanë aftësinë për ta çuar vendin përpara.
“Mënyra se si zgjedhim – kriteri ynë është mjaft i rëndësishëm – zgjedhim njerëz të cilët janë të pastër, që nuk vënë më parë “Unin” e tyre dhe më pas vijmë “Ne” dhe kanë aftësinë për ta çuar vendin aty ku është përparimi, kuptimi i ndërsjellë dhe ecja përpara”, tha ai/Opinion.al
