Jani Alia, person i shpallur në kërkim ka ekzekutuar me gjakftohtësi Elton Çiçen në prani të tre personave të tjerë në lokalin “De Niro” në kryeqytet. Jani Alia është 39 vjeç nga Tepelena.
Ditën e vrasjes, Alia duket se mbante një paruke, poshtë kapeles, për të mos u njohur nga kamerat e sigurisë. Në foton që shpërndau policia, Jani Alia duket krej ndryshe, nga pamjet e kamerave të sigurisë natën kur ndodhi vrasja.
Pak metra më tej, thanë burime të policisë e priste Renato Milloshi. 36 vjeçari nga Berati ishte shoferi i kësaj makine, tashme të sekuestruar nga policia. Ata largohen të dy me shpejtësi nga vendi i ngjarjes. Milloshi e kishte blerë këtë makine vetëm 2 ditë para se të vritej Elton Çiço.
Drejtori i policisë së Tiranes, Ervin Hodaj tha se shkaqet e vrasjes dihen nga policia, por nuk bëhen publike.
Por Alia dhe Miloshi nuk janë të vetmit që morën pjesë në vrasjen e Çiços. Me to kanë qenë edhe 2 persona të tjerë të identifikuar nga policia, por që nuk janë bërë ende publikë.
Policia ka vënë 500 mijë lekë shpërblim për këdo që ka një informacion për këta persona.
Jani Alia dhe Renato Miloshi janë të dy persona me precendentë penalë për vepra të rënda penale.
Jani Alia rezulton se në 24 prill të këtij viti ai është plagosur në Gjirokastër.
Renato Milloshi, djali i të ndjerit Hysni Milloshi, ish-kryetar i Partisë Komuniste, ka qenë i dënuar për armëmbajtje pa leje të armëve sportive dhe kanosjen e një personi. Sipas vendimit, Milloshi kishte kërcënuar me armë një shtetas.
Për vrasjen e Çiços, aktualisht janë arrestuar edhe 2 persona të tjerë për veprime që pengojnë zbulimin e së vërtetës, Alban Trimi dhe Redjan Rraja.
Elton Çiço u ekzekutua me 2 plumba në kokë mbremjen e 1 majit në Tiranë. Ai ishte ulur në një lokal me 3 persona të tjerë kur futet Jani Alia dhe e qëllon me pistoletë.
