Ambasadori amerikan dhe stafi i tij në Irak janë evakuuar si pasojë e protestave jashtë ambasadës amerikane në Bagdad, të cilat vinë si kundërpërgjigje e sulmeve të fundit ajrore të Shteteve të Bashkuara, që kanë lënë të vdekur të paktën 25 persona të grupit militant të mbështetur nga Irani, Kataeb Hizbullah.
Agjencia e lajmeve, The Associated Press ka raportuar se dyert e hyrjes së ambasadës janë thyer, janë dëgjuar të shtëna, si dhe disa protestues kanë ndezur zjarr jashtë ndërtesës.
Presidenti amerikan, Donald Trump ka fajësuar Iranin për sulmin dhe po ashtu ka thënë se SHBA-ja pret që Iraku të përdorë fuqinë që ka për ta mbrojtur ambasadën.
“Irani ka vrarë një punonjës amerikan dhe ka plagosur disa të tjerë. Ne jemi përgjigjur fuqishëm, ashtu si çdo herë. Tani Irani është duke organizuar një sulm në ambasadën amerikane në Irak. Ata do të jenë plotësisht përgjegjës”, tha ai.
Nga ana e saj qeveria e Irakut, pas sulmeve ajrore ka thënë se do të “rishikojë” marrëdhëniet me SHBA-në, duke argumentuar se forcat amerikane kanë vepruar sipas prioriteteve të tyre politike dhe jo të irakienëve.
Kujtojmë se Shtetet e Bashkuara ndërmorën disa sulme ajrore në Irak dhe Siri kundër militantëve të mbështetur nga Irani. Kjo lëvizje erdhi si kundërpërgjigje ndaj sulmeve me raketa që i morën jetën një amerikani disa ditë më parë.
Si pasojë e bombardimeve amerikane në 5 objektiva të militantëve shiitë të mbështetur nga Irani raportohet të kenë humbur jetën 25 persona dhe janë plagosur 55 të tjerë./Opinion.al
