Kryeministri Edi Rama ka reaguar pas akuzave të bëra nga kreu i opozitës Lulzim Basha në emisionin “Opinion”, se qeveria ka fshehur numrin e vdekjeve nga covid.
Teksa ka shpërndarë videon e reagimit të mjekëve, Rama ka paralajmëruar në “Facebook” se ditën e nesërme do iu drejtohet shqiptarëve me një mesazh të drejtpërdrejtë.
Rama shkruan se akuzat e kryedemokratit kanë kaluar përtej politikës, ndërsa shton se ato cënojnë integritetin profesional të mjekëve dhe nxisin dhunë ndaj tyre.
LEXO EDHE: Basha: Dokumenti nga morgu, nga 923 vdekje Covid janë raportuar 509
“Për akuzën e pashembullt të Lulëzim Bashës, e cila cënon drejtëpërdrejtë integritetin moral e profesional të mjekëve të vijës së zjarrit dhe nxit dhunë ndaj tyre, do t’u drejtohem nesër shqiptarëve me një mesazh të drejtëpërdrejtë, sepse këtu është shkuar shumë shumë larg, përtej çdo caku të politikës së ulët ditore dhe këtu nuk është më fjala thjeshtë për llafet e një aktori të papërgjegjshëm! Sot u shpreh të gjithë solidaritetin dhe mbështetjen time, profesoreshë Najada Çomos e të gjithë skuadrës së saj shembullore, duke u përulur me mirënjohje përpara stërmundimit të tyre të përditshëm prej nëntë muajsh me radhë, si edhe duke u thënë që historia e mjekësisë shqiptare do të flasë për ta kur Lulëzim Bashës e xhagajdurëve të tjerë të botës mizerabël të shpifjeve e të thashethemeve, t’u jetë harruar emri, nami e nishani!”-shkruan Rama./ Opinion.al
