Ministria e Shëndetësisë ka reaguar pas akuzave të bëra nga kreu i Partisë Demokratike, Lulzim Basha mbrëmë në emisionin “Opinion”, ku u shpreh se qeveria po fsheh numrin real të viktimave nga koronavirusi.
Në reagimin e saj, ministria thotë se solidarizohet me mjekët e vijës së parë të frontit kundër COVID-19, pasi sipas saj, gjenden nën një akuzë jo vetëm të shëmtuar politike, por edhe të rrezikshme për bluzat e bardha.
LEXO EDHE: Basha: Dokumenti nga morgu, nga 923 vdekje Covid janë raportuar 509
Ministria shprehet se akuzat e Bashës cenojnë rëndë dinjitetin e mjekëve dhe nxit agresivitetin ndaj tyre, në një kohë kur ata përballen me pandeminë. Më tej në reagim thuhet se teksa qeveria ka bërë gjithçka për të ulur rastet e dhunës fizike ndaj mjekëve, opozita stimulon dhunë ndaj tyre.
Po ashtu, theksohet se përveç mjekëve, askush tjetër nuk mund të përcaktojë shkaqet e fataliteteve në kartelat mjekësore të pacientëve.
Ministria e Shëndetësisë dhe Mbrojtjes Sociale e fton Bashën që çdo paqartësi ta diskutojë me autoritetet shëndetësore përpara se sa të shpërndajë akuza për fshehje të viktimave nga COVID./ Opinion.al
