Është zbardhur letra e edukatores Redina Binjaku, të cilën e paraqiti këtë të martë në Gjykatën e Fierit përmes avokatit, për mungesën e saj në seancën gjyqësore.
Në letër 27-vjeçarja i shpreh ngushëllimet familjes së fëmijës së mitur, që humbi jetën në kopshtin ku ajo punonte, ndërsa shton se është e ngarkuar psikologjikisht dhe për këtë shkak nuk mund të marrë pjesë në zhvillimin e seancës gjyqësore.
Gjykata vendosi masën e sigurisë “Arrest me burg” për 30 ditë për edukatoren 27-vjeçare. Ajo u arrestua për vdekjen e vogëlushit 3-vjeçar në një kopsht privat në Fier, të premten e shkuar.
“Unë shtetasja Redina Binjaku mora njoftim për seancën gjyqësore të datës 11.01.2022 ora 10:00. Në radhë të parë i shpreh ngushëllimet më të sinqerta familjes së të miturit Noah Kodheli.
Jam shumë e ngarkuar psikologjikisht prej situatës në të cilën ndodhem. Për këtë shkak nuk mund të marr pjesë në zhvillimin e seancës për vlerësimin e arrestit dhe caktimin e masës së sigurimit personal.
Kërkoj të përfaqësohem nga avokati im Ylli Asimetaj, anëtar i Dhomës së Avokatisë Fier”,-shkruan 27-vjeçarja në letrën e saj./Opinion.al
