Enada Koçiraj do të jetë deputetja më e re e Kuvendit të Shqipërisë. Nëse mandati i saj miratohet zyrtarisht nga KQZ, Enada Koçiraj do të bëjë betimin në Parlament në seancës e së enjtes, vetëm 24-vjeç.
Por çfarë thoshte ajo në fushatën e vitit 2017? Në fjalën e mbajtur në fushatën përmbyllëse, kandidatja e Vlorës ishte 22 vjeç dhe i shprehte mirënjohjen “familjes së madhe LSI” duke thënë se ishte e përgatitur për sfidat politike.
“Jam kandidatja më e re e LSI-së në këto zgjedhje. Ka nga ata që e shohin me dyshim kandidimin tim për shkak të moshës, por ka edhe nga ata që janë entuziastë. Jam vërtetë e re, por e përgatitur për të gjitha sfidat politike, i jam mirënjohëse prindërve dhe familjes, por mbi të gjitha familjes sime politike Lëvizjes Socialiste për Integrim”, thoshte në vitin 2017 ajo.
Koçiraj do të zëvendësojë Shezai Rrokajn në listën e Vlorës. Duket si ironi e fatit, që profesor Rrokajn do ta zëvendësojë një vajzë me një CV modeste, e cila ka përfunduar gjimnazin në një shkollë jopublike, si edhe ka kryer vetëm studimet bachelor në Fakultetin e Drejtësisë, ndërsa nuk ka asnjë eksperiencë pune./Opinion.al
