Përveç makinave 3000 kubikshe, qeveria do të taksojë nga 1 janari 2016 edhe makinat me vlerë mbi 50 000 euro. Komisioni Parlamentar i Ekonomisë ka vendosur vetëm me votat e mazhorancës që të shtojë edhe kriterin e çmimit në listën e makinave të ashtuquajtura të luksit, që do të paguajnë 21 mijë lekë taksë çdo vit nga 1 janari i vitit që vjen.
Ndërsa për këto kategori makinash, pra mbi 3000 kubik dhe me një vlerë mbi 50 mijë euro regjistrimi do të kushtojë 70 mijë lekë.
Në fillim qeveria planifikoi që të tatojë si makina luksi vetëm automjetet mbi 3000 kubikë, por kjo gjë u kundërshtua si nga opozita, por edhe nga deputetë të mazhorancës, të cilët kërkuan një rishikim të ndarjes, që i bëhet makinave të luksit.
Ndryshimet e sjella nga Komisioni Parlamentar i Ekonomisë pritet të miratohen në Parlament në paketën fiskale 2016. /tvklan/
