Në ditën e festës së Pashkës, krerët politik të shtetit shqiptarë kanë uruar besimtarët katolik dhe ortodoks.
Kryeministri Rama ka uruar i pari besimtarët nëpërmjet një postimi në facebook:
“Mirëmëngjesi, dhe ju uroj GËZUAR PASHKËT me këtë imazh të ikonës së famshme Burimi Jetëdhënës në 2013 dhe sot.
Kjo vepër e mrekullueshme, është tanimë pjesë e pavionit të Muzeut Onufri bashkë me shumë ikona të tjera të shpëtuara e të nxjerra në dritë, me forcën e dashurisë për këtë vend, të respektit për vlerat tona historike e kulturore, të pasionit politik për ta rilindur Shqipërinë.
Shumë është bërë për trashëgiminë dhe thesaret tona historike e kulturore. Ende më shumë mbetet për t’u bërë. Por edhe shumë ka për të humbur nëse ndalemi sot në rrugën për #ShqipërinëQëDuam me #Shtet #Punë #Mirëqenie”, shkruan Rama.
Kreu i Kuvendit Ilir Meta ka qenë në kishën Otordokse paraditen e sotme ku edhe ka uruar besimtarët “Pashkët janë ndihmë për një të nesërme më të mirë”, është shprehur Meta.
Po ashtu kreu i opozitës Lulzim Basha ka uruar nga çadra e protestës, e cila ndodhet aty prej dy muajsh.
“Kjo ditë përfaqëson ngjalljen e shpresës. Për këdo që bashkohet në këtë festë dua t’i them se tash e 60 ditë këtu në çadër është ditë pashkësh pasi ngjallet dhe lind shpresa për një Shqipëri më të mirë. I themi atij që i fryn tantameve të luftës se paqja do zbresë në zemrën e çdo shqiptari dhe më e mira do të pushojë sheshet e qyteteve dhe fshatrave tanë”, ka thënë Lulzim Basha.
Kryetari i Bashkisë së Tiranës përcolli urimet e tij komuniteteve fetare të krishtera me rastin e festës së Pashkës. Ai theksoi se kremtimi i kësaj dite duhet të shërbejë si një mesazh edhe për politikën, për të lënë mënjanë dasitë e vogla të ditës dhe të bëhen bashkë për të mirën e përbashkët. “Ne të politikës, ndoshta në ditë si sot, duhet të jemi pak me turp, kur shohim si myslimanë e të krishterë që përqafohen, pajtohen, urojnë njeri tjetrin, nuk ka asnjë arsye që ne, mes shqiptarësh, në parti të ndryshme politike, të mos gjejmë gjuhën e të lëmë inate të vogla personale për të mirën e vendit, për të mirën e qytetit dhe të Shqipërisë. Besoj që kjo ditë na kthjellon pak më shumë për të kuptuar se ka më shumë gjëra që na bashkojnë se ato që na ndajnë dhe një Shqipëri e mirë është e mundur, e kemi vetë në dorë, që përtej kapriçove e inateve të punojmë për një vend më të mirë”, u shpreh Erion Veliaj./opinion.al
