TIRANE- Shoqëria civile përveç fondeve që merr prej donatorëve financohet edhe nga Qeveria. Është pikërisht Agjencia për Mbështetjen e Shoqërisë Civile që drejtohet nga Andi Kananaj që i ndan këto fonde për shoqatat. Përpos ish-aktivistëve të MJAFT, janë edhe disa gazetarë që marrin para nën petkun e shoqatave.
Deputetja Albina Deda e PD-së ka denoncuar shpërndarjen klienteliste të fondeve të shoqërisë civile në Parlament. Referuar raportit që disponojmë prej deputetes Deda, mesojmë se agjencia e cila drejtohet nga Andi Kananaj (ish-aktivist i organizatës MJAFT) e ka zyrën brenda ambienteve të Ministrisë së Mirëqenies Sociale.
Kujtojmë se Mjaf drejtohej dikur nga Erjon Veliaj dhe në 2014 Kananaj u bë drejtues agjencie pikërisht kur Veliaj ishte ministër i Mirëqenies Sociale.
Po kush është tjetër në bordin e kësaj agjencie?
Endri Fuga, tjetër ish-anëtar i MJAFT dhe aktualisht Drejtori i Informacionit të Kryeministrit Edi Rama. Adrian Thano, gazetar, ish-drejtor i Shekullit aktualisht drejtor i gazetës së majtë “Dita”. Aldo Merkoçi është një tjetër aktivist i MJAFT që ka zënë vend në këtë bord. Edhe prezantuesi i njohur i TCH Alban Dudushi i Top rezulton në këtë bord.
Por si ka shpërndarë fondet kjo agjenci?
Pesë milionë lekë ka përfituar kreu i bordit, Kananaj për projektin “Së bashku për të njohur dhe ndihmuar fëmijët me nevoja të veçanta në shkollë”. Ky projekt zbatohet në zonën elektorale të Veliaj, në Gjirokastër.
“Shoqata e gazetarëve profesionist” me qendër në Frakull të Fierit, e drejtuar nga xhaxhai i Ardian Thanos, Kristaqi gazetar lokal në Fier, ka marrë 5 milionë lekë përmes projektit “Nisma lobuese për një qeverisje me të mirë lokale për komunën Frakull”.
Kozara Kati e cila është po ashtu anëtare e bordit të kësaj agjencie rezulton të ketë përfituar 12 milionë lekë. Ky fond i është dhënë permes “Qendrës Shqiptare për të Drejtat e Njeriut” ku Kati është drejtuese.
Qendra “Sfida”, e drejtuar nga një tjetër aktiviste e MJAFT Ornela Hamitaj ka marrë 8 milionë, në kuadër të projektit “Organizatorë të komunitetit”.
Plot 7 milionë ka thënë Agjencia për Mbështetjen e Shoqërisë Civile për Qendrën Eurisocialiste e Rinore (organizata rinore e Partisë Socialiste).
Për rastin e fundit, Albina Deda thotë se jo vetëm është klientelist por edhe i ndaluar me ligj pasi kjo agjenci nuk duhet të financojë organizata partiake.
