Norcia është një qytet i vogël, i ndodhur në zonën qendrore të Italisë së goditur rëndë prej tërmetit 6.2 ballësh të 24 gushtit. Por, ndryshe nga Amatrice apo Accumoli, ku vazhda e shkatërrimeve ishte thuajse e përmasave apokaliptike, ajo nuk ka pësuar veçse humbje të vogla.
Dëmet materiale nuk janë të konsiderueshme dhe viktima nuk ka. Arsyeja përse Norcia, e ndodhur vetëm 16 km larg epiqendrës së tërmetit, nuk pati të njëjtin fat si fqinjët e saj është projekti i përforcimit të ndërtesave, i vënë në jetë disa dekada më parë, pas lëkundjeve 5.9 ballëshe të tokës në 1979-n.
“Tërmeti ishte shumë i fortë. Nuk do ta harroj kurrë. Zgjati goxha, ky ishte problemi, dukej sikur s’do të mbaronte kurrë. Gjërat nisën të binin në tokë, por banesa nuk u dëmtua. Ne e kemi përforcuar shtëpinë pas tërmetit të 1979-s. Godinat, që prej atëherë i janë nënshtruar një projekti antisizmik. Falë kësaj siç duket nuk patëm humbje jetësh, siç ndodhi në Amatrice dhe Accumoli”, tha Christina, banore e Norcias.
Forcimi i banesave do të kushtonte nga 150 deri në 330 dollarë për metër katrorë, një kosto kjo mjaft e lartë për disa nga familjet e zonës.
“Është shumë shtrenjtë për ne. Përforcimin do ta bënim vetëm nëse projektin e subvencionon qeveria, qoftë edhe sikur të heqë 40 apo 50% të shpenzimeve”, tha Milla Menza, banore.
Zyrtarët italianë kanë nisur një hetim, i cili do të fokusohet te strukturat e shembura pas tërmetit të së mërkurës./TCH
