Arsyeja e refuzimit të vizës së drejtuesit të organit të akuzës në Durrës, Agron Gjana ka qenë mungesa e dokumentacionit në fazën e aplikimit për vizë.
Gazeta Panorama, mëson se kryeprokurorit që nuk iu dha vizë nga SHBA, i është komunikuar arsyeja e refuzimit, menjëherë, me anë të një dokumenti të shkruar.
Sipas gazetës në fjalë, arsyeja e refuzimit të vizës e shkruar në atë letër të dorëzuar aplikuesit ka qenë tekstualisht mungesa e dokumentacionit në fazën e aplikimit për vizë.
Panorama, shkruan se burime pranë kreut të Prokurorisë së Durrësit, Agron Gjana thanë se ai ndodhet në Shqipëri dhe se nuk ka udhëtuar për në SHBA me delegacionin ku edhe ka qenë pjesë.
VIZITA NË SHBA
Tri ditë më parë, disa media në Shqipëri njoftuan se kryeprokurori Adriatik Llalla gjatë vizitës në SHBA ka zhvilluar takime me zyrtarë të Byrosë Federale të Hetimit, FBI-në dhe Agjencinë e Antidrogës, DEA.
Por ditën e djeshme, “Top Channel” mësoi përmes një burimi zyrtar amerikan se zoti Llalla nuk ka pasur takime me zyrtarë të lartë të FBI-së, ose të Administratës Ligjzbatuese të Antidrogës, DEA.
Nga ana tjetër, Prokuroria e Përgjithshme tha se delegacioni i organit të akuzës ka shkuar me ftesë për vizitë zyrtare në SHBA, pa dhënë komente të mëtejshme.
