Në ditët e sotme shumica e njerëzve e konsiderojnë domosdoshmëri aktivitetin fizik dhe sapo mbarojnë punën, e cila shpesh sjell lodhje dhe stres, i drejtohen palestrës për të shkarkuar energjitë negative. Por ja disa arsye pse duhet të ushtroheni në natyrë:
Stërvitja në natyrë shton pozitivitetin
Një studim i 2012-s zbuloi se të kalosh kohë në natyrë i bënte njerëzit 50% më të lumtur sesa të kalonin kohë në palestër. Edhe kërkimet e mëparshme e kanë lidhur stërvitjen jashtë me një ulje të tensionit, konfuzionit, inatit dhe depresionit, kur u krahasuan me aktivitetin brenda katër mureve.
Përmirëson vëmendjen dhe fokusin
Një studim i shkurtër nga Universiteti i Illinois-it zbuloi se fëmijët me çrregullime mendore ADHD ishin të aftë që të përqendroheshin më mirë pas një shëtitjeje prej 20 minutash në park, krahasuar me një shëtitje në rrugët e qytetit, apo të lagjes.
Do t’ju ndihmojë ju që ta doni stërvitjen
Një vëzhgim i vitit 2011 doli ne perfundimin se të stërvitesh në natyrë ta riforcon dëshirën për të dalë e për t’u ushtruar prapë. Madje kjo dëshirë është më e fortë sesa tek ata persona të cilët zgjedhin palestrën për të punuar për trupin e tyre.
Pesha juaj do jetë e qëndrueshme
Një studim i vitit 2008 zbuloi se përqindjet e fëmijëve me peshë mbi normalen të cilët kalonin më shumë kohë jashtë ishte 27 deri në 41 më ulët krahasuar me fëmijët që kalonin më shumë kohë brenda katër mureve.
Do prodhoni më shumë energji
Është e sigurt që ushtrimet do t’ju rinojnë kur ju ta ndieni veten të përfshirë nga përtacia, por ajri i freskët mund ta shtojë edhe më shumë këtë efekt. Një studim i vitit 2009 nga Universiteti i Rochester-it zbuloi se vetëm 20 minuta jashtë mund të të gjallërojnë.
Do të përmirësohet niveli i vitaminës D
Të bësh ushtrimet jashtë është një mënyrë shumë e mirë që të thithësh vitaminë D shtesë. Një studim i 2011-s që zbuloi se ushtrimet e vrullshme prodhojnë nivele më të larta të vitaminës, hamendësoi se kryerja e tyre në natyrë mund të jetë arsyeja e kësaj. /Shqip
