Kompania e shpallur fituese për koncesionin e laboratorëve, një kontratë me vlerë 100 milion dollarë në 10 vite, figuron e lidhur me të njëjtët persona të cilët kanë një tjetër kontratë disa milionë dollarësh në shëndetësi, atë të koncesionit të check up-it.
Firma “Labopharma”, fituesja e koncesionit të laboratorëve, është në pronësi të Janis Karathano. Karathano rezulton po ashtu të jetë pronari firmës “Pegasus”, e cila tregton dhe importon produkte medicinale.
Fitimet më të mëdha te tij vijnë pikërisht nga Pegasus, e cila ka marrëdhënie intensive biznesi me kompaninë që administron check up-in.
Në një raport auditimi të “Deloitte”, rezulton se Janis Karathano i ka dhuruar firmës që ka koncesionin e check up-it, në pronësi të biznesmenes Vilma Nushi, pajisje laboratorike dhe programe të nevojshme për të bërë analizat.
Të gjitha këto, nënvizon raporti, janë dhënë falas, për shkak se koncesionari i check up-it bleu pjesën më të madhe të medikamenteve mjekësore të “Pegasus”.
Menjëherë, që këtë vit, konsorciumi që fitoi kontratën me qeverinë shqiptare do të marrë 7 milion dollarë, ndërsa vitet e tjera do të marrë10 milion.
Ndryshe nga sa ka ndodhur me “Pegasus”, me kompaninë tjetër “Labopharma”, biznesmeni Karathano rezulton me humbje.
Vitin 2015-të “Labopharma” e ka mbyllur me 170 mijë dollarë humbje. Në 2014-ën dhe 2015-ën, ka krijuar detyrime në vlerën e 570 mijë dollarëve, ndërsa më parë kishte bërë kërkesë për të pezulluar aktivitetin.
Tv Klan
