Luan Rama është kandidatura e propozuar nga Lëvizja Socialiste për Integrim, për të qenë pjesë e komisionit të posaçëm për Vettingun.
Emri i dytë që u zyrtarizua nga mazhoranca ishte ai i Shpëtim Idrizit, kreut të PDIU-së. Ndërkohë pritet të mësohet edhe kandidati i Partisë Socialiste.
Anëtarët e komisionit do të votohen sot në seancën e jashtëzakonshme të Kuvendit të Shqipërisë që pritet të mbahet në orën 18.00. Sakaq, opozita nuk ka pranuar që të jetë pjesë e seancës plenare dhe në të njëjtën orë, lideri demokrat Lulzim Basha do të mbajë fjalë në çadrën e protestës të ngritur para kryeministrisë, prej më shumë se dy javësh tashmë.
Komisioni i përbashkët ka deputetë të mazhorancës dhe opozitës të cilët do të shqyrtojnë kandidaturat e ardhura nga Avokati i Popullit dhe Operacioni i Monitorimit Ndërkombëtar për institucionet e rivlerësimit të prokurorëve dhe gjyqtarëve. /Express
