Një shpërthim me eksploziv shkatërroi të mërkurën në mëngjes një varkë në Volorekë të Pogradecit, që ishte vendosur në anë të rrugës dhe pranë liqenit.
Varka ka qenë e Renato Kadillit, pronar vaske peshku, i cili rezulton person me precedentë penalë. Nga shpërthimi është dëmtuar edhe makina e Kadillit, që ishte parkuar aty pranë.
Në korrik të vitit 2011, bashkë të vëllanë dhe një tjetër person, Kadilli është arrestuar në një aksion antidrogë. Makina me të cilën ai drejtonte, u ndalua në aksin nacional Tepelenë-Përmet, në hyrje të qytetit të Këlcyrës dhe aty u gjetën rreth 50 kg marijuhanë.
Kadilli rezulton me precedentë edhe për vjedhje. Në shtator të vitit të shkuar, ai është arrestuar për vjedhjen e 25 koshere bletësh gjatë natës së 21 shtatorit në Qafë-Thanë.
Ndërsa dy muaj më parë, në fshatin Zagorcan të Pogradecit është përfshirë në një konflikt që ka degjeneruar në të shtëna me armë zjarri.
