Operacioni “Forca e Ligjit” ka çuar sot në sekuestrimin e rreth 1 milion euro llogari bankare të një shqiptari që humbi jetën në një atentat në tetor të vitit të kaluar në Greqi në kuadër të operacionit “Forca e ligjit”.
Bëhet fjalë për shqiptarin Roland Shëmbitrasi, i cili u vra në moshën 39-vjeçare në tetor të vitit 2017 në lokalin e tij në lagjen Glifadha të Athinës.
Shëmbitrasi me origjinë nga Korça prej vitesh ishte rezident në Greqi. Ai ishte i martuar dhe babai i dy vajzave të mitura.
I plagosur gjatë atentatit mbeti edhe një shqiptar tjetër. Hetuesit grekë thanë atë kohë se ngjarja kishte lidhje me trafikun e drogës dhe dyshohet për larje hesapesh mes bandash. Roland Shëmbitrasi njihej edhe me nofkën “Ron Tenxherja” në lagjen Glifadha.
Ai kishte qenë edhe më herët në burg në Greqi.
Hetuesit grekë janë të bindur se 39-vjeçari është ekzekutuar për trafikun e kokainës në lokalet e natës në Athinë.
Në qarqet e drogës, apo “mafia shqiptare” në Athinë sikurse i quan shtypi grek, ai njihej me nofkën “Ron Tenxherja”. Ai ishte bashkëpronar edhe i tre lokaleve të tjera, dy prej të cilave janë luksoze dhe ndodhen në lagjen “Kalithea” të Athinës. Në këto lokale nate shkonin rregullisht këngëtarë të njohur grekë.
Në vitin 2012, Roland Shëmbitrasi ishte arrestuar nga policia pasi kishte punësuar një ekip prej 10 personash që shpërndanin kokainë me motorë tek klientët VIP të 39-vjeçarit.
Ai kishte marrë nofkën “Ron Tenxherja” për shkak se njihej për përpunimin që i bënte kokainës të cilën e shiste më shtrenjtë se dikush tjetër.
