Sërish portali i qeverisë vazhdon sqarimet për lajmet e abuzimeve me tenderat të publikuara nga mediat përgjatë këtyre ditëve. I fundit i adresohej Ministrisë së Mbrojtjes dhe 12 zyrtarëve të saj. Në reagimin e saj qeveria bën të ditur se procedurat për tenderin e rikonstruksionit të Ministrisë së Mbrojtjes, janë kryer konform kuadrit ligjor në fuqi.
“Në këtë garë kanë marrë pjesë 17 firma, ndërsa fituesi nuk është një shoqëri ashtu si pretendohet në artikujt e portaleve, por bashkimi i dy operatorëve ekonomik, operatorit “Rei” sh.p.k. dhe operatorit “Infinit Construction” sh.p.k..”
Lidhur me mospërmbushjen e kritereve nga firma fituese, portali sërish e mohon, duke pohuar se të dyja shoqëritë “Infinit Construction” sh.p.k. ashtu edhe “Rei” sh.pk., kanë si objekt të veprimtarisë së tyre tregtare ndërtimin dhe rikonstruksionet e objekteve të ndryshme.
Po kështu, transparenca.al, bën të ditur se edhe në lidhje me Sistemin e Integruar të Vëzhgimit të Hapësirës Detare, “ndryshe sa pretendohet në artikuj, kompania e përzgjedhur është përfaqësuesi zyrtar i kompanisë “GEM Elektronika”, prodhues i këtyre radarëve”.
