Ka mbërritur edhe reagimi i ambasadës së Shteteve të Bashkuara të Amerikës për deputetin socialist të dorëhequr Armando Prenga. Ajo thotë se e mirëpret largimin e tij nga parlamenti. Gjithashtu ambasada thotë se institucionet duhet të jenë vigjilente në mënyrë që të mos ketë më persona me dosje penale në zgjedhjet e 18 Qershorit 2017.
Reagimi i ambasadës vjen në kohën kur Prenga vendosi vetë të largohej dhe jo gjatë debatit mes prokurorisë dhe KQZ për mandatin e tij. Kujtojmë se organi i akuzës kërkoi disa herë ti ndërpritet mandati, ndërsa KQZ rezistoi derisa Prenga u largua vetë.
Deklarata e plotë
Ambasada e SHBA mirëpret largimin e ish-deputetit Armando Prenga nga parlamenti. Personat me dosje penale nuk kanë vend në parlamentin, gjykatat, qeverinë, apo bashkitë e një vendi anëtar të NATO-s i cili gjithashtu synon t’i bashkohet BE-së. Inkurajojmë qytetarët shqiptarë dhe institucionet shqiptare të jenë vigjilentë për parandalimin e kriminelëve nga kandidimi në zgjedhjet e 18 qershorit. Shqiptarët meritojnë të kenë një sistem politik dhe gjyqësor të pastër, pa ndikimin e krimit të organizuar dhe korrupsionit.
