Baftjar Bruka, i ekstraduar dy ditë më parë nga Suedia, për t’u përballur para drejtësisë me akuzat për sulmet me tritol ndaj familjes së Saimir Tahirit, është lënë në arrest me burg nga Gjykata e Krimeve të Rënda.
“Panorama” shkruan sot se ai ka mohuar akuzat e ngritura ndaj tij.
Njësoj si daja i tij, Vladimir Gjuta, i cili ka dëshmuar thuajse 6 muaj më parë, edhe 24 vjeçari Bruka ka mbajtur të njëjtin qëndrim, duke pretenduar se akuzat e ngritura ndaj tyre janë të sajuara nga SHISH dhe Policia e Shtetit.
Një ditë pasi Interpoli e solli të prangosur në Shqipëri, hetuesit e Prokurorisë për Krime të Rënda nuk kanë humbur kohë, duke i marrë dje deklarimet rreth ngjarjes së ndodhur në shkurt të vitit 2015.
Gjatë procesit të marrjes në pyetje, Baftjar Bruka nuk ka pranuar të japë hollësira rreth akuzave të ngritura ndaj tij, duke pretenduar se të gjitha janë sajuar nga Shërbimi Informativ Shtetëror dhe oficerët e Krimeve të Rënda të Policisë.
Ai është shprehur se as ai dhe asnjë nga të afërmit e tij të ndaluar për sulmin me eksploziv në farmacinë e Bashkim Tahirit, babait të ministrit të Brendshëm, apo tritolin e gjetur në stacionin e urbanit pranë “Vasil Shantos”, nuk kanë lidhje me këto ngjarje.
Ndërsa ka refuzuar të flasë më tepër rreth ngjarjeve.
Bruka u ekstradua të enjten nga Suedia, i shoqëruar nga oficerët e Interpol Tiranës. Bashkëpunëtori dhe nipi i Vladimir Gjutës dyshohet se është një prej autorëve të vendosjes së tritolit te farmacia e babait të Saimir Tahirit.
Gjykata e Krimeve të Rënda, më 25 shkurt të vitit të kaluar, vendosi ndaj tij masën e sigurisë “arrest me burg”. Ai akuzohet për “vepra për qëllime terroriste”, “krijim të grupit të strukturuar kriminal” dhe “kryerje të veprave penale nga grupi i strukturuar kriminal”.
MOHIMI I GJUTES
Sipas akuzës, Baftjar Bruka dyshohet se në bashkëpunim me dajën e tij, Vladimir Gjuta, dhe disa persona të tjerë, kanë ideuar, organizuar dhe vendosur një sasi tritoli në farmacinë e babait të ministrit Tahiri më 10 shkurt të vitit të kaluar.
Në paraqitjen e tij të parë në Gjykatën për Krimet e Rënda, Vladimir Gjuta mohoi të kishte lidhje me sulmet me tritol ndaj farmacisë së Bashkim Tahirit.
Të njëjtin qëndrim ai ka mbajtur edhe për minën me celular të gjetur të pashpërthyer në rrugën “Muhamet Gjollesha”, pranë vendit ku parkonte automjetin babai i ministrit.
Pretendimet e Gjutës u shfaqën në qershor të vitit 2015, gjatë seancës së vlerësimit të masës së sigurisë “arrest në burg” dhënë ndaj tij në mungesë.
Pretendimet e tij janë kundërshtuar nga përfaqësuesi i Prokurorisë, sipas të cilit Gjuta është i dyshuari kryesor si organizator i këtyre ngjarjeve.
“Nuk kam asnjë lidhje me shpërthimin e tritolit në farmacinë e babait të Saimir Tahirit, apo me çfarë thotë prokurori”, mësohet të jetë
shprehur Gjuta nga kafazi i sallës së gjyqit. Sipas burimeve, ai ka shfajësuar edhe të arrestuarin tjetër, kosovarin Blerim Thaçi, që u kap me të në tunelin e Kalimashit, duke u shprehur se kishte hipur rastësisht në automjetin e tij në zonën e Vorës.
Gjuta dyshohet për akuzat e “veprave me qëllime terroriste”, “krijimi të grupit të strukturuar kriminal” dhe “kryerjen e veprave penale nga grupi i strukturuar kriminal”. Për arsye sigurie dhe për shkak të ruajtjes së sekretit hetimor, seanca u zhvillua me dyer të mbyllura për median dhe publikun.
Në përfundim të saj, Gjykata vendosi lënien e pandryshuar të masës “arrest në burg” për të dyshuarin Gjuta. Përveç Vladimir Gjutës, i arrestuar nga forcat RENEA në tunelin e Kalimashit, në qershor të vitit të kaluar, vazhdojnë të jenë në burg në pritje të gjykimit edhe Lumjan Matmuja, Kamber Bruka, Erjon Dule dhe Emirjon Gjuta.
Ndërsa pas disa ditë qëndrimi në burg është liruar Ernest Gjuta për mungesë provash që e implikojnë në shpërthimin me tritol. /Panorama.al
