Më herët raportuam për një incident në takimin e Kryeministrit me nxënësit e ekselencës. ERTV-ja e vetmja që filmonte “live” ndërpreu transmetimin, duke mos shfaqur në asnjë moment studenten që i ndërpreu fjalimin Ramës.
Tashmë mësohet se është pikërisht “Lëvizja për Universitetin” që ka protestuar për tarifat e larta. Po kështu kanë dalë pamjet e flimuara me celular në sallë, ku shihen 3 bodyguard-ët e Ramës që nxjerrin zvarrë studenten përjashta.
Statusi në facebook i Lëvizjes për Universitetin
Në takimin e sotëm të kryeministrit Rama me studentët, profesorët dhe dekanët, ku u përsëritën si zakonisht gënjeshtrat e ulëta në lidhje me arsimin e lartë, një grup prej aktivistëve tanë shpalosën banderolën: “Boll i zhvatët studentët”.
Për fat të keq, banderola u shqye nga rinia partiake ndërsa aktivistët u nxorën me forcë jashtë sallës së konferencës, në praninë e heshtur të drejtuesve të universitetit publik. Një student u shoqërua në komisariatin nr. 3 për t’ia fshirë filmimet jashtë çdo norme ligjore.
Ne u bëjmë thirrje studentëve dhe drejtuesve të universitetit publik të mos i nënshtrohen shantazhit të qeverisë por të gjejnë guximin për të reaguar kundër zhvatjes dhe për t’u bashkuar në rrugë këtë vjeshtë, kundër tarifave dhe për demokraci në universitet.
