Prokuroria ka vendosur që Yoram Frik, shtetas izraelit, i cili kap ditën e djeshme në aeroportin e Rinasit me një pajisje përgjimi, duhet të hetohet në gjendje të lirë.
Pas disa orësh i marrë në pyetje, Yoram Frig u la i lirë, por me një kusht, që të mos largohet ende nga Shqipëria.
Aktualisht izraeliti është akomoduar në një hotel, ndërsa i është sekuestruar pasaporta dhe celulari i tij.
Pronari i objektit të dyshimtë është 51-vjeçari Yoram Frig, banues në Telaviv, i cili ka dy kompani investigimi, një në Qipro dhe një në Izrael.
Policia e Tiranës reagoi mbrëmë zyrtarisht në lidhje me këtë rast, duke deklaruar se pajisja e dyshimtë dhe një telefon i shtetasit të huaj janë sekuestruar aktualisht nga prokuroria.
“Nga informacione të marra për hyrjen e shtetasit të huaj nga Izraeli, F.Y., 51 vjeç, në pikën e kalimit kufitar Rinas, me një pajisje elektronike, sektori për Krimin Ekonomiko- Financiar në Drejtorinë Vendore të Policisë Tiranë filloi veprimet verifikuese dhe procedurale në bashkëpunim me njësinë e prokurorisë Task- Forcë, pranë Prokurorisë së Rrethit Gjyqësor Tiranë, nën drejtimin e prokurorit të gatshëm”, tha dje policia.
Ndërsa sqaroi se ky shtetas është ndaluar nga shërbimet e Policisë Kufitare Rinas, në momentin që ishte duke dalë nga territori i Shqipërisë dhe u shoqërua në ambientet e Komisariatit të Policisë, Rinas.
Pas mbajtjes së personit në ambientet e Komisariatit Rinas, në drejtimin e prokurorit u bë këqyrja e kësaj aparature elektronike dhe pritet akt-ekspertimi për të përcaktuar çfarë funksioni kryen.
