Pas sulmeve intensive kundër Iranit, Izraeli ka vendosur të mbyllë përkohësisht të gjitha ambasadat e tij në mbarë botën, përfshirë edhe Ambasadën izraelite në Tiranë.
Përmes një deklarate zyrtare, ambasada izraelite njoftoi se do të ndalohen të gjitha shërbimet konsullore, pa dhënë një afat se kur do të rikthehen në funksionim.
Autoritetet izraelite kanë kërkuar nga qytetarët jashtë vendit të tregojnë kujdes të shtuar, duke shmangur shfaqjen e simboleve hebraike apo izraelite në vende publike për shkak të rrezikut në rritje.
Ndërkohë për rastet e emergjencave jepet sugjerimi i kontaktit dhe që të verifikohen rekomandimet apo udhëzimet përkatëse.
“Në dritën e zhvillimeve të fundit, misionet izraelite në të gjithë botën do të mbyllen dhe shërbimet konsullore nuk do të ofrohen. Një formular online është i disponueshëm për izraelitët jashtë vendit, për të raportuar vendndodhjen dhe statusin e tyre aktual.
Ju lutemi plotësojeni atë për të ndihmuar Ministrinë e Punëve të Jashtme të qëndrojë e përditësuar.
Në rast emergjence ose fatkeqësie, kontaktoni menjëherë Dhomën e Situatave të Ministrisë. Kontrolloni rekomandimet e Këshillit të Sigurisë Kombëtare për vendin ku ndodheni aktualisht, si dhe udhëzimet e përgjithshme të sigurisë për izraelitët jashtë vendit”, thuhet në njoftim.
Këshillat:
-Shmangni shfaqjen e simboleve hebraike ose izraelite në hapësirat publike.
-Përmbahuni nga postimi i detajeve të identifikueshme në lidhje me vendndodhjen ose planet tuaja të udhëtimit në mediat sociale.
-Shmangni pjesëmarrjen në tubime të mëdha ose ngjarje të lidhura me Izraelin ose komunitetet hebraike.
-Bashkëpunoni me forcat lokale të sigurisë dhe ndiqni udhëzimet e tyre menjëherë nëse ekspozoheni ndaj aktivitetit armiqësor.
-Qëndroni vigjilentë shtesë në vendet publike.
-Në rast emergjence, kontaktoni misionin në vendin e banimit duke përdorur numrat e emergjencës që shfaqen në faqen “Na Kontaktoni”.
