Siç shkruan The Times, e cila ka publikuar edhe një raport, Izraeli ka pasur agjentë të infiltruar në territorin iranian që prej vitit 2010, për të monitoruar programin bërthamor dhe atë të raketave balistike të Iranit.
Duke cituar burime të inteligjencës dhe dokumente të klasifikuara që thuhet se janë ndarë me vende perëndimore, raporti thekson se shërbimet izraelite kishin ndërtuar prej kohësh një rrjet informativ në disa zona kyçe të Iranit.
Pretendimet izraelite vijnë pas një përplasjeje 12-ditore mes dy vendeve, që nisi pas një sulmi të befasishëm të Iranit me qindra dronë dhe raketa mbi territorin izraelit, një përgjigje ndaj bombardimit të konsullatës iraniane në Damask.
Izraeli reagoi më pas me një valë goditjesh ajrore mbi objektiva strategjikë brenda Iranit, përfshirë qendra të lidhura me programin bërthamor dhe ushtarak.
Shërbimet izraelite pretendojnë se deri në fund të vitit 2024-ës, Irani kishte kaluar fazën teorike të armës bërthamore dhe kishte filluar testimet për ndërtimin e një pajisjeje shpërthyese “brenda pak javësh”.
Po sipas raportit, oficerë të inteligjencës izraelite kishin hartuar strukturën e brendshme të kompleksit bërthamor në Natanz përpara se ky të goditej nga forcat ajrore.
Hetimet dhe infiltrimet e fshehta janë shtrirë edhe në lokacione të tjera strategjike, përfshirë Isfahanin, Nurin, Mogdehin, Shariatin dhe qendrën kërkimore Shahid Meisami. Në dokumentet e siguruara nga Izraeli thuhet se është depërtuar edhe në selinë e Gardës Revolucionare Islamike, një tjetër objektiv i goditur gjatë sulmeve ajrore.
Pavarësisht këtyre pretendimeve, Irani i ka mohuar vazhdimisht akuzat për ndërtimin e armëve bërthamore, duke këmbëngulur se programi i tij është thjesht për qëllime paqësore.
Por përplasjet e fundit, sipas analistëve ndërkombëtarë, kanë rikthyer frikën për një konflikt të hapur rajonal dhe për përshkallëzim të mëtejshëm midis dy fuqive rivale të Lindjes së Mesme.
