Gaza po shndërrohet në një varrezë të madhe. Ushtria e Izraelit ka bombarduar 3 kampe të ndryshme të refugjatëve.
Raportohet se në Jabalia në veri Gazës janë vrarë mbi 50 persona, në Nuseirat, në qendër të Rripit janë vrarë të paktën 15 vetë, dhe të paktën dhjetë persona të tjerë janë vrarë në një bombardim izraelit të kampit të refugjatëve Al-Shati, përgjatë bregut të qytetit të Gazës.
Gjatë ditës, qeveria e Izraelit njoftoi se ka goditur 300 shënjestra në Gaza, teksa sulmet ajrore dhe ofensiva tokësore nuk ka ndalur.
Tel Avivi akuzon forcat e Hamas se kanë sulmuar me antitank dhe raketa të tjera. Grupimi militant palestinez, pas bombardimeve në kampin e refugjatëve, u kërkon vendeve arabe dhe myslimane “të marrin një qëndrim historik dhe vendimtar për të ndaluar masakrat” e kryera nga Izraeli dhe atë që e përshkruan si “gjenocid” kundër popullit palestinez.
Gjatë ditës, Uashingtoni dhe Tel Avivi refuzuan thirrjet për armëpushim, duke thënë se tani është koha për luftë.
Ndërkohë, dy nga zyrtarët më të afërt të presidentit amerikan, Joe Biden, u kërkuan ligjvënësve që të japin 14.3 miliardë dollarë ndihma për Izraelin, 9 miliardë për arsye humanitare.
Teksa seanca e dëgjimit për sekretarin e shtetit, Antony Blinken, dhe sekretarin e mbrojtjes nisi, një grup personash ngritën duart e tyre të lyer me bojë të kuqe në shenjë proteste për të kërkuar ndalimin e luftës së Izraelit në Gaza.
