Policia e Shkodrës ka dhënë informacion zyrtar në lidhje me tritolin e vendosur në automjetin në pronësi të kreut të PD, në Vaun e Dejës, Bernard Ndreca. Ngjarja ka ndodhur rreth orës 07:10, në fshatin Paçram, ndërsa mësohet se tritoli ishte vendosur në pjesën e përparme të automjetit tip “Audi”.
Policia njofton se nga veprimet e para rezulton se shpërthimi ka ndodhur në momentin që Ndreca ka hipur në makinë.
Nga shpërthimi, kreu i PD-së në Vaun e Dejës, Benard Ndreca nuk ka pësuar lëndime, por janë shkaktuar vetëm dëme të pjesshme materiale.
“Rreth orës 07:10, në fshatin Paçram, Vau i Dejës, në pjesën e përparme të automjetit tip “Audi”, në pronësi të shtetasit B. N., dyshohet se ka shpërthyer lëndë plasëse. Me marrjen e njoftimit, menjëherë në vendngjarje kanë shkuar shërbimet e Policisë dhe grupi hetimor. Nga veprimet e para rezulton se shpërthimi ka ndodhur në momentin që shtetasi B. N. ka hipur në automjet. Nga shpërthimi, shtetasi B. N. nuk ka pësuar dëmtime, por janë shkaktuar vetëm dëme të pjesshme materiale”-njofton policia.
Grupi hetimor, në drejtimin e Prokurorisë, vijon veprimet intensive në vendngjarje, me qëllim zbardhjen e rrethanave të ngjarjes, identifikimin dhe kapjen e autorit/ve.
