Policia ka dhënë detaje sot mbi operacionin e zhvilluar ditën e djeshme ku u arrestuan 7 persona dhe u sekuestrua një sasi prej 32.5 kanabisi në formë çokollate.
Operacioni i koduar me emrin “Tranzit” është zhvillur nëpërmjet bashkëpunimit të Policisë së Tiranës dhe Dibrës.
Si rezultat u bë i mundur arrestimi në flagrancë i shtetasve: E. R., 52 vjeç, P. A., 51 vjeç, Sh. M. 51 vjeç, D. M., 20 vjeç, F. D., 37 vjeç, M. P., 32 vjeçe, A. H., 38 vjeç.
Sipas policisë këta persona janë arrestuar në kushtet e flagrancës. Ata kishin siguruar lëndën narkotike në shtetit grek dhe e kishin kaluar nëpërmjet kufirit nga Konispoli, nëpërmjet dy shtetasve me banim në Gjirokastër. Me pas lënda narkotike do transportohej në qytetin e Tiranës, me qëllim për ta nisur më vonë në një qytet në veri të vendit, për ta trafikuar jashtë Shqipërisë.
Një nga të arrestuarit e këtij operacioni është 51-vjeçari, Pajtim Aga, i dënuar më parë për veprën trafik lëndësh narkotike. Ai është vëllai i Robert Agës, shef i Qarkullimit në qarkun e Dibrës. Ky i fundit pas arrestimit të vëllait është pezulluar nga detyra.
Po kush është Robert Aga?
Robert Aga është ish-shefi i komisariatit të Dibrës që u interceptua edhe në përgjimet e publikuara nga gazeta ‘BILD’ të dosjes 184, teksa komunikonte me zyrtarë të lartë të PS, Ulsi Manja, Saimir Tahiri dhe Xhemal Qefalia por dhe duke biseduar për një takim me kryeministrin Rama.
Në bisedat e publikuara ai dëgjohet të kërkojë favore përsa i përket pozicionit të punës në këmbim të mbështetjes së PS në Dibër gjatë zgjedhjeve të 2017. Në një nga bisedat ai dëgjohet duke i thënë ish-ministrit të Brendshëm Saimir Tahiri: “Unë jam ushtari yt”
Pas zgjedhjeve ai u emërua shefi i Qarkullimit Rrugor në Kukës, ndërsa gjatë zgjedhjeve lokale të vitit 2019 ai u fotografua duke shoqëruar materialet zgjedhore në Dibër.
Robert Aga është një prej drejtuesve të policisë që dyshohet se është përfshirë në trafikun e lëndëve narkotike. Emri i tij përmendet në disa dokumente të publikuara në media që Shërbimi Informativ i ka dërguar Prokurorisë së Krimeve të Rënda dhe Ministrisë së Brendshme mbi përfshirjen e Policisë së Shtetit në kultivimin dhe trafikimin e kanabisit në periudhën 2015-12017.
Megjithëse emri i tij figuronte në raportin e SHIK dhe në përgjimet e ‘BILD’ ku si funksionar policie ndihmonte një subjekt politik, ai kishte mbetur i paprekur dhe madje ushtronte detyrën e shefit të qarkullimit në Dibër. Pavarësisht bëmave të tij është arrestimi për herë të dytë tashmë i vëllait të tij që ka sjellë dhe shkarkimin nga detyra. Pajtim Aga njihet si biznesmen në zonën e Dibrës. Megjithatë në vitin 2016 ai është arrestuar nga Policia e Lezhës pasi u kap me 320 gramë kokainë por më vonë u lirua në rrethana ende të panjohura. /Opinion.al
