U bë i njohur për publikun pasi mori përsipër autorësinë e vrasjes së të riut shqiptar Gjergji Gjoni, pak javë më parë në periferi të Milanos. Francesco Sicignano, pensionisti që deklaroi se e vrau të riun shqiptar gjatë një tentative grabitjeje, ka vendosur t’i futet politikës.
Mediat italiane raporojnë se ai do të kandidojë si këshilltar komunal në listat e partisë së Silvio Berluskonit, “Forza Italia” për zgjedhjet e ardhshme lokale. Pensionisti e bëri publik vetë lajmin gjatë një konference për shtyp, ku tha se kishte pranuar propozimion për të kandiduar.
“Zgjodha “Forza Italia”. Duhet të mbrojmë pronat tona, kjo nuk do të thotë që të gjithë të kenë armë, por ata që dinë t’i përdorin. Në Itali nuk ka siguri, duhet të bëhet diçka menjëherë, i bën apel ministrit Alfano dhe i them të forcojë kontrollet, pasi këtu të gjithë hyjnë pa kontroll” –tha Sicignano
Ndërsa koordinatori i “Forza Italia”, Fabio Altitonante u shpreh se “Forza Italia” nuk do të jetë një parti e “far west”, por kërkon siguri për gjithë qytetarët, edhe për shtëpitë e tyre, të ndërtuara më shumë vite sakrificë. Po ashtu italianët duhet të jenë të sigurtë dhe të lirë për të jetuar në shtëpitë e tyre pa u rrezikuar nga dhuna dhe të qënit të dhunuar. Dhe sipas tij, Francesco Sicignano i prezanton pikërisht këto vlera.
