Referendumi për numrin e deputetëve dhe senatorëve në Itali ka shkuar në favor të reduktimit të tyre.
Sipas exit-polleve por edhe rezultateve reale paraprake, rreth 70% e qytetarëve kanë votuar për ndryshimin e kushtetutës, që ka qenë një nga betejat e hershme të Lëvizjes “5 Yje”.
Kështu, dhoma e deputetëve do të bëhet me 400 deputetë nga 630, ndërsa senati nga 315 në 200.
“Kthehemi tek një Parlament normal, me 400 vende edhe privilegje më pak”, tha ministri i Jashtëm dhe lider i Lëvizjes, Luigi Di Maio i cili e cilësoi rezultatin si një arritje historike.
“Me fitoren e Po-së, hapet një sezon i ri reformash”, deklaroi Nicola Zingaretti, sekretari i Partisë Demokratike që është në koalicion me “5 Yje”-t.
Ndërkohë, edhe e djathta e Legës së Matteo Salvinit kishte mbështetur referendumin, por shton se “populli ka vendosur reduktimin, dhe do të ishte e udhës të shpërbëhej Parlamenti në mënyrë që të shohim me zgjedhje të reja eficencën e reformës së miratuar”, deklaruan drejtuesit e partisë.
Sot u votua edhe në rajone të ndryshme italiane, për presidentin e tyre. Toskana, Pulia dhe Kampania mbeten me kandidatët e koalicionit të qendrës së majtë, ndërkohë që Liguria, Veneto, Val D’Aosta dhe Marke u fitohuan nga partitë e djathta.
