Italia ka regjistruar numrin më të lartë ditor të rasteve me koronavirus që prej fillimit të pandemisë.
Autoritetet shëndetësore kanë raportuar për 21,273 të infektuar nga rreth 161 mijë testime.
Lajmi i mirë është se ka pasur një ulje të numrit të viktimave krahasuar me një ditë më parë. Në 24 orët e fundit kanë ndërruar jetë 128 persona, krahasuar me 151 të së shtunës. Deri tani, në Itali kanë humbur jetën nga koronavirus 37,338 persona.
Më herët, kryeministri i Italisë, Xhuzepe Konte, ka njoftuar masa të reja kufizuese në një konferencë për shtyp.
Qeveria italiane ka urdhëruar mbylljen e palestrave dhe pishinave dhe ndërsa baret dhe restorantet mund të ofrojnë shërbime me porosi ata duhet të ndalojnë konsumimin e pijeve dhe ushqimeve në ambientet e brendshme nga ora 18:00. Kinematë dhe teatrot gjithashtu do të mbyllen, por muzetë do të qëndrojnë të hapura.
Nuk do të ketë ndalim të udhëtimit ndër-rajonal, megjithëse njerëzit janë këshilluar fuqimisht të mos largohen nga shtëpitë e tyre përveç nëse për qëllime pune, shëndetësore ose arsimore. Deri në 75% të mësimdhënies së shkollës së mesme duhet të bëhet në internet për të kufizuar numrin e nxënësve në shkolla, sipas dekretit të ri.
Konte tha se masat e reja kishin për qëllim të shmangnin llojin e bllokimit të ashpër që vendi përjetoi në pranverë. “Ne duhet të bëjmë sa më shumë të jetë e mundur për të mbrojtur shëndetin dhe ekonominë … ne e dimë se kjo po gjeneron zemërim dhe pabarazi”, tha ai./ Opinion.al
