Në Itali priten të zhvillohen zgjedhjet administrative më 26 maj, të cilat përkojnë në një kohë me zgjedhjet Evropiane.
Në listat e partive të ndryshme politike mësohet se do të ketë disa kandidatë, të cilët janë me origjinë shqiptare. Një prej tyre është avokatja Anisa Rama, e cila do të kandidojë për partinë “Forza Italia”. Ajo së bashku me familjen e saj kanë emigruar në Itali, në Puglia, në vitin 1992.
Duket se integrimi i avokates së re në Itali ka qenë më i lehtë nga çfarë prisnin familjarët e saj, pasi ata nuk kanë ndjerë paragjykim.
Anisa ka nisur të punojë gjatë kohës së studimeve universitare. Pas tyre ajo ka punuar si avokate, ndërkohë që përfshirja e saj në politike ka ndodhur pasi ka dashur të gjendet pranë njerëzve për t’i ndihmuar.
Ajo dëshiron që përmes politikës të përmirësojë cilësinë e jetesës së njerëzve dhe gjithashtu të respektohet dhe zbatohet ligji. Gjithashtu pjesë e kontributit të saj në politikë do të jetë edhe përmirësimi i paketës ligjore për emigrantët shqiptarë në Itali.
Anisa Rama kandidon për “Forza Italia” në Bergamo, ku lista e kësaj partie përbëhet nga 32 kandidatë 14 femra dhe 18 meshkuj. Votuesit për zgjedhjet administrative në Itali do të jenë rreth 17 milionë./Opinion.al/
