Një shqiptar, me profesion kasap, ka masakruar në mes të rrugës me thikë gruan e tij me të cilën ishte në proces divorci. Ngjarja e rëndë ka ndodhur në Mantova të Italisë, pas një grindjeje mes tyre.
38-vjeçarja u transportua në gjendje të rëndë drejt spitalit të Mantovës, ndërsa burri u arrestua menjëherë nga policia.
Mediat italiane shkruajnë se dëshmitarë të ngjarjes së rëndë janë bërë shumë njerëz, të cilët kanë thënë në polici se mes çiftit shqiptar ka pasur fillimisht një përplasje verbale.
“Ti do të më shkatërrosh”, dëgjohej të thoshte burri, para se të ndërmerrte aktin ekstrem. Ata thonë se ai e ka goditur gruan më pas me thikë, fillimisht në krahë e më pas në qafë.
Për ta ndaluar aktin ekstrem ka ndërhyrë pronari i një palestre aty pranë, i cili thuhet se është përleshur me të, dhe mësohet se ka marrë një gërvishtje thike në gjoks gjatë përleshjes.
Policia pohoi se nuk ka publikuar identitetin e dy shqiptarëve për të mbrojtur fëmijët e tyre të mitur./Opinion.al
