Një infermier 41-vjeçar, nga Shqipëria, po hetohet në gjendje të lirë së bashku me të dashurën e tij pasi dyshohet se i kanë zbrazur llogarinë bankare një të moshuari me koronavirus.
Sipas Il Messagero, më 13 Mars, një 66-vjeçar nga Cividate al Piano (Bergamo), u shtrua në spital me simptoma të koronavirusit.
Infermieri, me banim në Boltiere (Bergamo), me ndihmën e të dashurës së tij vodhi portofolin e burrit të moshuar, duke shpenzuar një shifër prej 6 mijë euro nga karta e tij e kreditit. Fatkeqësisht, 66-vjeçari u përkeqësua në 18 mars dhe vdiq në repartin e kujdesit intensiv në 18 prill.
Anëtarët e familjes së viktimës panë lëvizjet e pazakonta në llogarinë bankare dhe u drejtuan me një padi në policinë lokale të Romano di Lombardia (Bergamo), ku u identifikuan dhe autorët.
“Një veprim i shëmtuar, në një moment tragjik, një abuzim i kryer ndaj një viktime”, tha kreu i policisë lokale, Arcangelo Di Nardo./Opinion.al
