Trupat e gjetur në tre valixhe pranë autostradës Firence-Pisa-Livorno mund të jenë të Shpëtimit dhe Teuta Pashos.
Një tatuazh do të identifikonte viktimat, por mediat italiane shkruajnë se do të pritet testi i ADN-së për të zbuluar nëse trupat e gjetur në valixhe janë të çiftit shqiptar, që ishin shpallur të zhdukur disa vite më parë.
Sipas autoriteteve, tatuazhi në dorë, ku shkruhet “Vlora”, si dhe një spirancë dhe iniciale “SHP”, bën që të dyshohet se burri është 54-vjeçari Shpëtim Pasho.
Për shkaqet e vdekjes, autopsia ndaj burrit, e kryer të shtunën e kaluar, tregoi se ai ka ndërruar jetë nga një goditje në fyt. Ndërsa gruaja, është dhunuar barbarisht, pasi kishte shumë hematoma në fytyrë dhe shumë kocka të thyera.
Më tej, mediat raportojnë se po vijojnë kërkimet në zonën për gjetjen e një valixheje të katërt pasi mungojnë ende disa pjesë të trupave të viktimave.
Në valixhen e parë u gjet busti dhe një këmbë e burrit, pastaj në një tjetër gjymtyrët e poshtme të gruas dhe në fund valixhja e tretë me bustin e saj. Ndërkohë, policia italiane thekson se mungojnë gjymtyrët e poshtme të burrit dhe për këtë arsye ka nisur kontrollet me qen të specializuar në të gjithë zonën e Firenzes.
Shpëtim dhe Teuta Pasho nga Vlora u zhdukën në Castelfiorentino më 2 Nëntor 2015./Opinion.al
