Mario Bressi, 45 vjeç, është vetëvrarë pasi ka mbytur dy fëmijët e tij, djalin 6 vjeçar dhe vajzën 12 vjeçare. Ngjarja e rëndë ka ndodhur në fshatin Margno një rrethinë me 400 banorë, në zonën e Valsassinas në Itali. Kufoma e babait u gjet shumë pranë trupave të pajetë të fëmijëve, ndërsa familja me origjinë nga Milano posedonte edhe një banesë fshati në Margno.
Policia në vendngjarje është duke kryer hetime për të kuptuar ekzaktësisht se çfarë ka ndodhur dhe pse. Sikurse shkruan ANSA, babai pasi ka vrarë dy fëmijët e tij është hedhur nga një urë shumë pranë vendit ku është kryer vrasja e dyfishtë. Ajo që ka gjetur trupat e pajetë të fëmijëve ishte nëna e tyre e cila ka mbërritur nga Milano me dëshpërim, pasi kishte marr një mesazh ku thuhej se nuk do i shihte më fëmijët. Çifti ishte duke u ndarë.
Mjeku ligjor që mbërriti në vendngjarje ka konfirmuar vdekjen e fëmijëve si pasojë e mbytjes.
“Me fëmijët e mi përgjithmonë”, shkruante 45-vjeçari në një foto të postuar në FB. Njeriu që nuk publikonte asgjë prej 1 viti, e kishte kryer këtë postim të fundit në 3 të mëngjesit.
“Sonte natën dëgjoja zhurma. Nuk po kutoja. Në mëngjes dëgjova ulërima dhe dola. Zbrita shkallët dhe pashë nënën e fëmijëve që ulërinte e dëshpëruar: ‘Nuk zgjohen, nuk zgjohen’. Edhe punonjësit e Kryqit të Kuq po qanin”, ka rrëfyer një fqinj i familjes Bressi.
“E njoh familjen. Fëmijët dje ishin duke luajtur të lumtur në oborr. Nuk mund ta besoj”, vazhdoi ai./Opinion.al
