Një vajzë shqiptare vetëm 1-vjeçe po lufton mes jetës dhe vdekjes, pasi ra nga kati i tretë i shtëpisë ku banonte.
Sipas mediave italiane, ngjarja e rëndë ndodhi rreth orës 10:30 të kësaj të marte në Modena të Italisë.
Sipas dëshmisë së nënës, një 25-vjeçare shqiptare, ajo ndodhej në shtëpi me të, kur në rrethana ende të paqarta 1-vjeçarja iu afrua dritares së dhomës së gjumit. Një dritare me e mbrojtur me kangjella të vegjël nga të cilat vogëlushja arriti të përkulej duke rënë poshtë.
Mësohet se 1-vjeçarja ra nga rreth 6 metra lartësi në oborrin e ndërtesës. Ndihmën e parë ia dha nëna e saj e cila vrapoi drejt katit të parë. E mori të bijën në krahë dhe kërkoi ndihmë tek klinika veterinare që ndodhet pranë shtëpisë. Pasi u intubua, e vogla u dërgua me urgjencë në spitalin e Modena-s, ku ndodhet në gjendje të rëndë për jetën.
Ndërkohë autoritetet policore kanë marrë në pyetje të ëmën edhe dëshminë e ndihmës së shpejtë. Për momentin nëna e re nuk rezulton të jetë nën hetim.
Ndërsa babai mësohet se punon në një kompani ndërtimi në Parma dhe ndodhej në punë në momentin e ngjarjes.
Kujtojmë se një aksident i njëjtë ndodhi korrikun e kaluar një vajzë 4-vjeçare ra nga kati i katërt i shtëpisë së saj. Vogëlushja ishte në shtëpi me mamanë e saj kur u përkul nga ballkoni ku po luante./Opinion.al
