Partia Demokratike publikoi sot dokumentin e Prokurorisë së Athinës që tregon se kryebashkiaku i Mallakastrës, Qerim Ismailaj ka qenë i dënuar me 3 vjet burg nga Gjykata e Kios në Greqi në vitin 2000.
Vërtetësia e dokumentit të Partisë Demokratike mbetet për t’u vërtetuar nga Prokuroria Shqiptare e cila do të shqyrtojë nëse Ismailaj ka konsumuar veprën penale të falsifikimit të formularit të dekriminalizimit.
Por duke parë të dhënat që vetë Qerim Ismailaj ka shkruar në formularin e dekriminalizimit, shohim se ato përputhen me ato në dokumentin e prokurorisë së Athinës.
Konkretisht, Qerim Ismailaj në të dy dokumentet ka të njëjtin emër, atësi, amësi, datëlindje si edhe të njëjtin numër të dokumentit të identifikimit i cili është unik për çdo person.
Sekretari i Përgjithshëm i Partisë Demokratike, Gazment Bardhi i bëri thirrje prokurorisë të regjistrojë procedimin penal dhe të hetojë Ismailajn.
Sipas ligjit të dekriminalizimit, asnjë subjekt i dënuar nuk mund të kandidojë për pozicione publike. Në formularin e tij të dekriminalizimit Qerim Ismailaj ka deklaruar se nuk ka qenë asnjëherë i dënuar ose nën hetim. Por dokumenti i sotëm i publikuar nga PD tregon të kundërtën. Nëse këto akuza do të vërtetohen atëherë ai është subjekt i veprës penale të falsifikimit të dokumentave shtetërore. /Opinion.al
