Skuadra kombëtare e futbollit të Turqisë ka mbërritur në Islandë për të zhvilluar ndeshjen e radhës për eleminatoret e Kampionatit Europian. Por mbërritja e ekipit turk ka shkaktuar një episod aspak të këndshëm që rrezikon të kthehet në një çështje diplomatike.
Sipas kapitenit Emre Belozoglu, ekipi është lënë në pritje për më shumë se tri orë në aeroport duke ju bërë kontroll të imtësishëm të bagazheve dhe pasaportave. Për ta çuar edhe më tej skandalin, një person që hiqej si gazetar i ka afruar kapitenit turk një furçë gjatë intervistës sikur të ishte mikrofon.
Kjo mënyrë pritjeje mori reagimin e menjëhershëm të Ankarasë zyrtare me Ministrin e Jashtëm Cavusoglu i cili e cilësoi si të papranueshme pritjen e skuadrës përfaqësuese, si në rrafshin diplomatik ashtu edhe atë humanitar.
“Nuk ka dyshime që do të bëjmë gjithçka që është e nevojshme”, tha Cavusoglu duke paralajmëruar dhe një notë proteste përmes ambasadës së Ankarasë në Norvegji. /Opinion.al
