Një rimorkiator i cili u nis nga Ankona me destinacion Shqipërinë, u fundos mbrëmjen e 18 majit në brigjet e Pulias, 50 milje nga Bari, në kufirin midis ujërave italiane dhe kroate.
Sipas gazetës italiane La Repubblica dy persona humbën jetën dhe tre të tjerë rezultojnë të zhdukur. Mësohet se komandanti u gjet i gjallë gjatë natës dhe u dërgua me urgjencë në spitalin Di Venere në Bari dhe fatmirësisht gjendja e tij nuk është e rëndë.
Roja Bregdetare e Barit po koordinon mjetet ushtarake dhe civile të cilat janë të përfshira në operacionin e kërkimit.
Në funksion të kërkimeve janë vënë gjithashtu avionë nga Marina, Forcat Ajrore dhe Forcat Ajrore Kroate.
Autoritetet kroate informuan autoritetet italiane për praninë e dy viktimave të konfirmuara. Ndërsa tre persona të tjerë janë ende të zhdukur dhe me kalimin e kohës shpresa për t’i gjetur ende gjallë zvogëlohet. Ekuipazhi përbëhej nga katër italianë (ndoshta disa nga Pulia) dhe një tunizian./Opinion.al
