Alfred Vefa, autori i dyshuar i vrasjes së 35-vjeçares Klodiana Vefa është gjetur i vdekur, raportojnë mediat italiane.
35-vjeçari me origjinë shqiptare është gjetur i pajetë në një zonë të izoluar të San Casciano në Val di Pesa. Sipas policisë, e cila e kërkonte prej orësh, ai vrau veten duke u qëlluar me të njëjtën armë me të cilën ndoshta kishte vrarë ish-bashkëshorten.
Rreth orës 4 të mëngjesit të së shtunës, në një zonë të izoluar të komunës San Casciano në Val di Pesa, një qytetar ka denoncuar një makinë të dyshimtë, të parkuar dhe të braktisur. Karabinierët që ndërhynë konstatuan se ishte makina e Alfred Vefës.
Klodiana Vefa, që punonte si kamariere në një piceri, ka qenë duke u kthyer nga puna kur rreth orës 20:00, kur pak metra pranë shtëpisë së saj i është afruar një burrë i cili e ka qëlluar me pistoletë me plumb në kokë.
Ajo jetonte me dy fëmijët e saj, djalin 17-vjeçar dhe vajzën 14-vjeçare. Nga ajo që raportohet në mediat italiane, Klodiana dhe Alfredi po ndaheshin pasi kohët e fundit kishte debate të shumta, me në qendër xhelozinë e bashkëshortit.
