Është zbardhur dëshmia e njërit prej miqve të viktimës Erigers Mihasit, i cili mbeti i vrarë në atentatin mafioz të së shtunës në “Astir”.
Sipas “News24”, shtetasi me inicialet A.H., ka deklaruar para policisë se Erigersi ishte shumë i kujdesshëm kur lëvizte, madje ka thënë se ai nuk ulej prej muajsh në lokale.
“Erigersi ishte shumë i kujdesshëm kur lëvizte, kontrollonte deri me 4 makina mbrapa. Kishte disa muaj që nuk ulej në lokale, por kur dilte ai lëvizte me makinë”,-mësohet të ketë thënë miku i tij.
Mihasi dyshohet të ketë qenë shënjestra e atentatit, ku humbi jetën dhe Armando Dumani. Për ngjarjen po hetohen anëtarët e “klanit Duka”. Mihasi ishte krahu i djathtë i Ervis Martinajt.
Sipas ekspertizës mjeko-ligjore, Erigers Mihasi është vrarë me 13 plumba, një prej të cilëve e ka kapur në qafë dhe pjesa tjetër në shpinë, ndërsa miku i tij 26-vjeçar Armand Dumani ka marrë 4 plumba.
Mbrëmjen e të shtunës, në zonën e “Astirit”, në drejtim të dy të rinjve është qëlluar me breshëri kallashnikovi, teksa ato po lëviznin me një automjet tip “Audi”./Opinion.al
