Një autobot i cili po transportonte karburant në autostradën Tiranë -Durrës është përfshirë nga flakët, mesditën e sotme rreth orës 14:00.
Flaka ka qenë në pjesë e parme të autobotit dhe në momentin e shpërthimit janë lënduar dy punonjës të karburantit ‘Gega Oil’, Xh.K., 20 vjeç, banues në Kamëz dhe E.P., rreth 35-vjeç, të cilët janë transportuar në spital për ndihmë mjekësore.
Zjarri nuk ka përfshirë depozitat e karburantit, pasi është vënë shpejt në kontroll nga 5 forca zjarrfikëse. Shkak dyshohet se është bërë një shkëndijë elektrike në sistemin e makinës.
Policia dhe zjarrfikëset kanë mbërritur në vendngjarje dhe kanë vendosur nën kontroll flakët, ndërsa autostrada është e hapur për qarkullimin e mjeteve.
‘Rreth orës 14:00, në autostradën Durrës-Tiranë, në një pikë karburanti, është përfshirë nga flakët një automjet që transporton karburant. Për pasojë janë lënduar shtetasit Xh.K., 20 vjeç, banues në Kamëz dhe shtetasi E.P., rreth 35-vjeç, (të dy punonjës të karburantit), të cilët janë transportuar në spital për ndihmë mjekësore.
Ndërhyrja në kohë e shërbimeve zjarrfikëse dhe Policisë ka izoluar flakët duke shmangur përfshirjen nga zjarri të çisternave me karburant. Shërbimet e Policisë evakuan në kohë, personat e tjerë që ndodheshin rreth zonës në rrezik.
Zjarri është shuar tërësisht dhe lëvizja e mjeteve në të dy krahët e autostradës po vijon normalisht. Grupi hetimor ndodhet në vendngjarje dhe po punon për zbardhjen e rrethanave të ngjarjes.’– njofton policia.
