Ndryshimet klimatike janë një kërcënim për popullatën dhe kryesisht fëmijët.
Një raport i ISHP dhe UNICEF në Shqipëri nxjerr në pah rritjen e sëmundjeve gastrointestinale, frymëmarrjes, alergjive, astmës tek fëmijët, si pasojë e ndryshimeve klimatike në vendin tonë.
Të dhënat e raportit tregojnë se sëmundjet gastroenterite kanë regjistruar gjatë një viti 32 mijë raste te fëmijët 0-14 vjeç. Mjekët thonë se ekspozimi i ushqimeve në temperatura të larta është faktor rreziku pasi favorizojnë shumëzimin dhe përhapjen e agjentëve infektiv në ujin e pijshëm dhe ushqimin në familje.
“Ndryshimet klimatike prekin të gjitha moshat, por më së shumti fëmijët, duke qenë se kanë një sistem imunitar në zhvillim e sipër. Është vënë re një shtim rastesh me sëmundjet alergjike. Gastroenteritet janë zakonisht me natyrë virale. Arsyeja pse shoqërohet një rritje e numrit të gastroenteriteve me ndryshimet e shumta klimatike është pasi vitet e fundit po shikojmë një rritje të temperaturave. Edhe fëmijët janë më të ekspozuar nga ushqimet që konsumojnë, edhe kushtet e ruajtjes mund të mos jenë optimale. Fëmija merr mikrob dhe na shfaq gastroenterite”, thotë pediatrja Arda Gjermeni.
Sipas raportit, 300-1000 raste të reja gastroenteriti për 100 000 fëmijë në vit i atribuohen rritjes me 1 gradë celsius të temperaturave, e cila pritet të arrijë deri në 5000 raste të reja shtesë çdo vit, në dekadën e ardhshme. Rastet e rënda dhe neglizhimi i diarreve pritet të ndikojnë negativisht në rritjen e vdekshmërisë.
