“Xhelozia patologjike dhe frika për një ndarje të mundshme, duket se kanë bërë që 40-vjeçari shqiptar i quajtur Festim t’i marrë jetën duke mbytur gruan e tij në Lakoni, të Greqisë”. Kështu shkruajnë mediat greke lidhur me ngjarjen që tronditi komunitetin ku çifti shqiptar jetonte.
Sipas mediave greke, shqiptari pas një debati e ka mbytur me duart e veta gruan e tij 36-vjeçare, teksa në dhomën ngjitur të shtëpisë flinin dy fëmijët e tyre të mitur. Pak minuta më vonë, në gjendje të qetë, ai thirri autoritetet duke rrëfyer: “Me siguri e kam vrarë gruan…”.
“Isha i inatosur kur më ofendoi, më pas e kapa nga fyti dhe e mbyta”, mësohet të ketë thënë 40-vjeçari në polici, duke përshkruar sherrin fatal që pati me gruan e tij mbrëmjen e së dielës.
Kjo ka qenë një nga zënkat e shpeshta që çifti shqiptar ka pasur, pasi burri, sipas asaj që ka thënë para autoriteteve, ka qenë i bindur se gruaja do ta linte.
Çifti kishte 2 djem, 8 dhe 10 vjeç, të cilët kur ndodhi vrasja ndodheshin në dhomën tjetër duke fjetur. Pas ngjarjes fëmijët ndodhen në shtëpinë e vëllait 36-vjeçar i cili prej disa kohësh jetonte me familjen në të njëjtin fshat pranë të afërmve të tyre, të cilët së bashku me psikologen e bashkisë kanë marrë përsipër t’i informojnë për realitetin e ri të vështirë në të cilin ata do të duhet të mësojnë që tani e tutje.
Tronditja për të dy fëmijët është e madhe pasi të dielën, sipas postimeve të 40-vjeçarit dhe djalit 10-vjeçar në faqet e tyre në “Facebook”, duket se familja ka jetuar momente të lumtura. Fotoja me 40-vjeçarin që ka Elonën në krahë pak orë para se ta mbyste, është realizuar nga djali i tyre 10-vjeçar, i cili është fotografuar edhe për herë të fundit pranë babait dhe nënës./Opinion.al
