De Biazi është munduar të “lajë duart” nga përgjegjësia e largimit të talentit Milot Rashica nga kombëtarja kuqezi. Megjithatë, tifozët dhe specialistët shqiptarë akuzojnë drejtpërdrejt 60-vjeçarin nga Sarmede për këtë “firo”, por edhe të tjera. Para pak ditësh ishte Astrit Hafizi, ish-trajneri i kombëtares sonë, që tha se “De Biazi mendon vetëm për veten”, duke kundërshtuar zgjedhjet që bëri për në finalet e “Euro 2016”, ndërsa sot është një tjetër emër i njohur i trajningut shqiptar, Faruk Sejdini, që e thellon kritikën karshi italianit. Duke folur për “Panorama Sport”, ish-trajneri i Dinamos, ndihmëstrajner në kombëtare, e ka vlerësuar kështu situatën që po ndodh mes dy kombëtareve, asaj shqiptare dhe kosovare, nisur edhe nga largimi i Rashicës, por jo vetëm, nga kuqezinjtë:
“Sa më shumë do të kalojë koha, aq më keq do të bëhet situata me ne. Nuk do të jetë më në favorin tonë, sepse lojtarët do të ndahen në dy pjesë. Pjesa dërrmuese e lojtarëve, që janë përdorur nga ekipet tona kombëtare, janë formuar jashtë dhe shumica prej tyre kanë prejardhje nga Kosova. Përderisa në Shqipëri nuk ka prodhim, është e natyrshme që situata do të vijë duke u vështirësuar. Është shpejt të mendojmë se do të ndodhë ndonjë e keqe e madhe, por nëse largimet vazhdojnë me këto ritme, mund të jemi në rrezik. Rasti “Rashica”? Problemi është që duhet të pranojmë se të gjithë lojtarët janë njerëz dhe kanë ndjenja. Të gjithë lojtarët i kanë kaluar këto kohë.
Edhe unë, në rast se nuk do më donte Tirana, kur isha 18 vjeç, do të zgjidhja një skuadër tjetër. Në rast se De Biasi do ta kishte marrë Rashicën në Europian, ai do të kishte mbetur këtu te ne. Ky është interesi personal i çdo lojtari. Në rast se ai sheh që në ekipin e Shqipërisë është i 18-ti në listë, do të shkojë te një skuadër, ku të jetë i 11-ti. Kjo është pjesë e egos personale, sepse këtu në Shqipëri e ngatërrojnë me patriotizmin. Ku ka më patriotizëm në futboll, kur te Gjermania luajnë lojtarë me ngjyrë. De Biazi është një rrogëtar dhe vjen këtu për të fituar lekë.
Më vonë do të ikë, siç janë larguar gjithë të tjerët. Ai paguhet dhe do të krijojë reputacionin e vet, diçkaje që ia ka arritur. De Biazi nuk mund t’i ketë planet pa mbarim, pasi e kishte në plane dhe e harroi. Rashica nuk mund të presë planin 5-vjeçar të De Biazit, sepse dëshiron të luajë futboll. Planet i bënte vetëm Enver Hoxha… De Biazi deri tani kishte një grup lojtarësh dhe kishte privilegj për të zgjedhur, ndërsa në të ardhmen nuk do ta ketë diçka të tillë. Lojtarët kanë dy opsione dhe tani vështirësohet puna.”
