Legjenda e futbollit rumun, sot në rolin e trajnerit, Gheorghe Hagi, pohon në një letër të hapur se drejtuesit aktualë të Federatës Rumune të Futbollit janë turpëruar në “Euro 2016”.
Ish-kapiteni i kësaj kombëtareje ballkanike deklaron se të gjithë duhej të ndiheshin të turpëruar pas humbjes kundër Shqipërisë. Hagi iu përgjigjur deklaratave të bëra nga Andrei Vochin, këshilltari i presidentit të FRF, Răzvan Burleanu, në shtypin sportiv, ku deklaroi se trajnerët e rinj kanë dështuar në stolin e ekipit kombëtar.
Gheorghe Hagi u ndje në shënjestër për shkak se zyrtari FRF kujtoi periudhën, në të cilën ai e udhëhoqi Rumaninë në periudhën korrik-nëntor 2001.
“Personalisht mendoj se ishte një formë shumë delikate për të më sulmuar, duke cituar dështimin, duke kujtuar periudhën shumë të shkurtër timen si trajner i ekipit kombëtar, pesë muaj (korrik-nëntor 2001), ku ne mundëm Hungarinë, humbëm me Slloveninë në kualifikimet e Kupës së Botës, për vitin 2002. Urime Andrei Vochin për përfundimin e analizave që keni arritur, se “të rinjtë kanë dështuar”, duke m’u referuar direkt mua, si trajner. Ju përgëzoj për këtë, por na keni poshtëruar në Kampionatin Europian.
Nëse unë do të isha i ri dhe i papërvojë, pas 20 vitesh futboll të luajtur në nivelin më të lartë kombëtar dhe ndërkombëtar, atëherë ju dhe presidenti i FRF jeni shumë-shumë-shumë të rinj dhe pa përvojë për ta udhëhequr futbollin rumun. Mendoni dhe reflektoni mbi atë që kam thënë dhe shpresoj se së bashku me presidentin e FRF-së, të kuptoni se ju jeni shumë të rinj dhe të papërvojë për të qenë në krye të futbollit rumun. Nën udhëheqjen tuaj, për herë të parë ekipi kombëtar na ka bërë të ndjehemi të turpëruar. Shqipëria na mundi në një ndeshje zyrtare dhe ky ishte fundi.”
