Ish-ministri i Drejtësisë, Ylli Manjani, është shprehur se demokracisë në vend i mungon një nga tre hallkat që garanton zbatueshmërinë e saj në jetën publike, duke e shndërruar Shqipërinë në të vetmin shtet në Europë apo më gjerë që nuk ka gjykatë.
Përmes një shënimi në rrjetin social Facebook, Manjani shkruan se Republika e Shqipërisë është e vetmja anëtare e Këshillit të Europës dhe e NATO-s; e vetmja në Europë apo më gjerë që nuk ka gjykata.
Ndërsa thekson se është shteti i vetëm me Kushtetutë në fuqi, por të pa zbatueshme.
Sipas tij, nuk ka një shtet të dytë në rruzull, diktaturë apo demokraci, që t’mos ketë gjykatë, një pushtet që jep drejtësi.
“Në këtë pikë kemi arritur me dëshirën fuqiplotë të Edvin Ramës, pa fuqinë e leaderve të tjerë politik për ta ndalur këtë katastrofë demokratike”,-shkruan Manjani.
Ai mendon se në këtë pikë nuk mund të përfundonin pa kontributin e BE-së që drejtohet nga pijanecë dhe shërbehet nga Marksistë dhe qokaxhinj që përpiqen të na mbushin mendjen se “sa mirë është pa gjykata”.
Më tej, Manjani shkruan se qokaxhinjtë në Bruksel dhe gojëmblat e tyre në Tiranë nuk shohin as dhunimin e sistemit demokratik; as drogën, as trafiqet e as vrasjet që kërcasin si në top të karadakut.
Për të zyrtarët e BE-së nuk kanë asnjë fuqi përveç se të shesin tangërllëk në vendi si i yni e me qeveri si kjo e jona.
“Merren me tendera e ushtrim influencash për qëllime që dreqi i di! Ky është zhgënjimi më i madh që po përjetojmë, jo pa dhimbje! Po kur thonë që “duhet të luftoni korrupsionin”?!! Ndërkohë kanë blerë një vilë pa tender dhe asnjë projekt i realizuar prej tyre këtu nuk ka asnjë lloj cilësie!!! Ndoshta Anglezët kishin të drejtë…”,-citohet nga shënimi i tij në Facebook.
