Akuzat e ngritura për ish-ministrin e Brendshëm, Saimir Tahiri dhe mënyra e trajtimit të tyre nga Edi Rama, kanë shkaktuar shumë komente dhe debate politike prej disa ditësh.
Një nga këta është edhe ish-ministri i Drejtësisë, Ylli Manjani, i cili përmes një postimi në Facebook, thekson se paralelizmi i arrestimit të ish-kreut të PS-së, Fatos Nano me kërkesën për arrest dhe hetim të Saimir Tahirit nuk kanë aspak lidhje me njëra-tjetrën.
Sipas tij, Fatos Nano u burgos nga qeveria e kohës që kishte kapur drejtësinë, e jo nga drejtësia, që është përballë me qeverinë.
Më tej, ai shkruan se Rilindja edhe pse paguan për t’i përdorur emrin Fatos Nanos, përsëri është vite larg politikisht.
“Nano pas burgut nuk bëri asnjë tentativë për të kapur drejtësinë, qoftë dhe për të marrë hak! Rilindja do ta kapë atë para burgut dhe për tu hakmarrë paraprakisht!”,-thekson Manjani.
Postimi i Plotë:
Flasin përçart
Jo Saimiri, por edhe Rama vetë e madje e gjithë kupola e Rilindjes sikur të arrestoheshin, prap nuk kanë lidhje me arrestimin e Fatos Nanos! Asnjë lidhje!
Nano u burgos nga Qeveria e kohës që kishte kapur drejtësinë, e jo nga drejtësia që është përballë me qeverinë!
Nano pas burgut nuk bëri asnjë tentativë për të kapur drejtësinë, qoftë dhe për të marrë hak! Rilindja do ta kapë atë para burgut dhe për tu hakmarrë paraprakisht!
Politikisht Nanos Rilindja i vjen anash, me thënë të drejtën! Cilido qoftë çmimi që paguan për ti përdorur emrin, prap Rilindja është vite drite larg Tij….
