Dritan Demiraj, i cili shërbeu si Ministër i Brendshëm për rreth katër muaj pas marrëveshjes Rama-Basha në maj të vitit 2017, ka reaguar nëpërmjet një statusi në Facebook për deklaratën e djeshme të kryeministrit.
Demiraj duke iu referuar fjalëve të Ramës se është zgjedhur dy herë kryeministër i këtij vendi, thotë se gjatë ushtrimit të detyrës u përball me arrogancën, kriminalitetin, hajdutërinë, përversitetin dhe paaftësinë qeverisëse të atij që e quan “sekti politik pink”.
“Ju dhe strukturat (vartësit tuaj) nuk bashkëpunuat qoftë dhe një sekondë për të dëgjuar mendimet dhe propozimet për heqjen, shkarkimin dhe dënimin e të gjithë baronëve të drogës dhe krimit që ishin te veshur me uniformën e policit dhe punonin në strukturat e Policisë së shtetit. Kam ndjekur dhe zbatuar praktikat ligjore dhe më pas kam kërkuar shkarkimin e disa Shefave të Komisariateve si të Pukës, Dibrës, Malsisë së Madhe dhe Gramshit të cilët ishin militant të mirëfilltë të PS si dhe mbështesnin dhe bashkëpunonin me elementë kriminal duke shpërndarë lekë dhe duke bërë presion mbi popullin, etj. Ka patur raste që kam marrë pjesë edhe vetë për arrestimin e elementëve kriminalë, prishjen e fushave me kanabis, pasi strukturat policore fatkeqësisht nuk arrinin të bënin arrestimin për arsye të lidhjes dhe suportit politik që u jepej nga nivelet e larta drejtuese policore apo politike (tashme të vërtetuara me zë dhe figurë)”, shkruan Demiraj.
Më tej, në statusin e tij, Dritan Demiraj e akuzon Ramën për shumë nga dështimet e qeverisjes së tij, që nga drejtësia, te depolitizimi i administratës, emigrimi dhe mungesa e investimeve të huaja.
“Sot fatkeqësisht nuk dëshiroja të të shikojë si “qeraman”, pasi rolin e “viktimizimit” mund ta keni përvetësuar që në rininë tuaj, falë studimeve në Akademinë e Arteve, ku na paraqitesh si “djali i mirë” dhe modest! Por në fakt duhet të jepni përgjigje për rritjen e numrit të shqiptarëve që duan të lënë vendin dhe zëvendësimin e tyre me “viktima” humane, duke “pasuruar kolorin e racave njerëzore” në Shqipëri, pasi i ke më të lehtë për t’i bindur dhe nënshtruar dhe për të arritur ambicjet tuaja si “diktatoruc ëndërrimtar” lindor!”, shkruan ndër të tjera Dritan Demiraj, i cili ndodhet në Shtetet e Bashkuara të Amerikës./Opinion.al
